پاکستان سمیت دنیا کے مختلف ممالک میں سوشل میڈیا پلیٹ فارم انسٹاگرام میں اچانک خرابی کے باعث ہزاروں صارفین کو مشکلات کا سامنا کرنا پڑ رہا ہے۔
رپورٹس کے مطابق زیادہ تر صارفین کو میسجز بھیجنے اور وصول کرنے میں دشواری پیش آ رہی ہے جبکہ کئی افراد نے فیڈ لوڈ نہ ہونے اور ایپ تک رسائی میں مسائل کی شکایت بھی کی ہے۔
خرابی کب شروع ہوئی؟
ویب سائٹس اور ڈیجیٹل سروسز کی خرابی سے متعلق معلومات فراہم کرنے والے پلیٹ فارم ڈاؤن ڈیٹیکٹر کے مطابق پاکستان میں صبح تقریباً 7 بج کر 10 منٹ پر انسٹاگرام ایپ اور ویب سائٹ میں خلل پیدا ہونا شروع ہوا۔
ڈاؤن ڈیٹیکٹر پر اس حوالے سے 13 ہزار سے زائد شکایات درج کی گئیں جن میں 71 فیصد ایپ کی ناکامی سے متعلق جبکہ 20 فیصد سرور کنکشن کے مسائل سے متعلق شامل ہیں۔
رپورٹس کے مطابق پاکستان، امریکا، یورپ اور کینیڈا سمیت دیگر علاقوں میں بھی صارفین کو انسٹاگرام استعمال کرنے میں مشکلات پیش آ رہی ہیں۔
خرابی کی ممکنہ وجہ
ابتدائی رپورٹس کے مطابق یہ مسئلہ خاص طور پر براہ راست میسجنگ (Direct Messaging) کو متاثر کر رہا ہے۔
ابھی تک انسٹاگرام کی مالک کمپنی میٹا کی جانب سے خرابی کی وجہ یا سروس کی مکمل بحالی کے بارے میں کوئی باضابطہ بیان جاری نہیں کیا گیا۔
ماہرین کے مطابق ایسے تکنیکی مسائل سرور اوورلوڈ یا ممکنہ سائبر حملوں کے باعث بھی پیش آ سکتے ہیں۔
