میٹا نے اعلان کیا ہے کہ وہ 8 مئی 2026 سے انسٹاگرام پر اینڈ ٹو اینڈ انکرپٹڈ ڈائریکٹ میسیجز کا آپشن ختم کردے گا۔ کمپنی کا کہنا ہے کہ بہت کم صارفین اس فیچر کو استعمال کررہے تھے جس کی وجہ سے یہ فیصلہ کیا گیا ہے۔
میٹا کے بیان کے مطابق انسٹاگرام ڈی ایمز میں بہت کم لوگ اینڈ ٹو اینڈ انکرپٹڈ میسجنگ کو فعال کررہے تھے، اس لیے آنے والے مہینوں میں یہ آپشن ہٹادیا جائے گا۔
کمپنی نے مزید کہا کہ جو صارفین انکرپٹڈ میسجنگ چاہتے ہیں وہ واٹس ایپ استعمال کرسکتے ہیں جو بطور ڈیفالٹ یہ سہولت فراہم کرتا ہے۔میٹا نے 2021 میں انسٹاگرام ڈائریکٹ میسیجز کے لیے اینڈ ٹو اینڈ انکرپشن کی آزمائش شروع کی تھی۔ یہ سی ای او مارک زکربرگ کے اس منصوبے کا حصہ تھا جس میں کمپنی کو پرائیویسی پر مرکوز مواصلاتی ٹولز کی طرف لے جانا تھا۔
تاہم یہ فیچر کبھی بھی تمام خطوں میں وسیع پیمانے پر متعارف نہیں کرایا گیا اور نہ ہی بطور ڈیفالٹ فعال تھا۔
فروری 2022 میں روس یوکرین جنگ شروع ہونے کے فوراً بعد میٹا نے یوکرین اور روس میں بالغ صارفین کے لیے انسٹاگرام پر انکرپٹڈ میسجنگ کا دائرہ کار بڑھایا تھا۔
کمپنی نے یہ فیچر تنازع کے دوران اضافی پرائیویسی تحفظ فراہم کرنے کے لیے متعارف کرایا تھا۔
یہ فیصلہ ایسے وقت میں سامنے آیا ہے جب بڑی سوشل میڈیا کمپنیاں میسجنگ پلیٹ فارمز میں انکرپشن کے کردار پر بحث جاری رکھے ہوئے ہیں۔
گزشتہ ہفتے ٹک ٹاک نے کہا تھا کہ وہ ڈائریکٹ میسیجز کے لیے اینڈ ٹو اینڈ انکرپشن متعارف نہیں کرائے گا۔
کمپنی کا مؤقف تھا کہ انکرپشن سے قانون نافذ کرنے والے اداروں اور سیفٹی ٹیموں کے لیے ضرورت پڑنے پر پیغامات کا جائزہ لینا مشکل ہوسکتا ہے۔
میٹا نے انکرپٹڈ انسٹاگرام میسیجز کے متبادل کے طور پر کوئی نیا فیچر متعارف کرانے کا اعلان نہیں کیا ہے اور صارفین کو محفوظ مواصلات کے لیے واٹس ایپ استعمال کرنے کی ہدایت کی ہے۔
