واٹس ایپ کی جانب سے ایک نئے پیڈ سبسکرپشن ماڈل کی آزمائش کی جا رہی ہے۔
اس ماڈل کا نام واٹس ایپ پلس رکھا گیا ہے جو اس وقت اینڈرائیڈ ڈیوائسز کے لیے واٹس ایپ کے بیٹا ورژن میں محدود صارفین کو دستیاب ہے۔
WABetaInfo کی رپورٹ کے مطابق واٹس ایپ پلس میں متعدد پے وال یا ایسے فیچرز موجود ہوں گے جن تک رسائی ماہانہ فیس ادا کرنے سے ہی ممکن ہوگی۔
واٹس ایپ ہیلپ سینٹر پیج کے مطابق واٹس ایپ پلس کے سبسکرائبرز کو پریمیئم اسٹیکرز تک رسائی حاصل ہوگی جبکہ وہ ایپ کی تھیمز اور آئیکونز کو بھی پرسنلائز کرسکیں گے۔
ان فیچرز سے ہٹ کر واٹس ایپ پلس کے صارفین 20 چیٹس کو پن کرسکیں گے جبکہ مخصوص کانٹیکٹس کے لیے پریمیئم رنگ ٹون سیٹ کرسکیں گے۔
اسی طرح کسٹمائز چیٹ لسٹس تیار کی جاسکیں گی جبکہ مزید فیچرز کو بھی اس پریمیئم پلان کا حصہ بنایا جائے گا۔
ابھی اس کی فیس کا اعلان تو نہیں کیا مگر رپورٹ میں پاکستان میں اس سبسکرپشن ماڈل کی ماہانہ فیس بھی بتائی گئی جو کہ ابھی 229 روہے ہے۔
رپورٹ میں مزید بتایا گیا کہ میٹا کی جانب سے واٹس ایپ کے بنیادی فیچرز جیسے میسجز بھیجنے، وائس کالز اور اینڈ ٹو اینڈ انکرپشن کو سبسکرپشن ماڈل کا حصہ نہیں بنایا جائے گا اور وہ بدستور مفت دستیاب ہوں گے۔
کمپنی کی جانب سے واٹس ایپ پلس کے ساتھ ساتھ انسٹا گرام پلس کی آزمائش بھی کی جا رہی ہے جس میں متعدد پریمیئم فیچرز صارفین کو دستیاب ہوں گے۔
رپورٹ میں مزید بتایا گیا کہ میٹا کی جانب سے واٹس ایپ پلس میں دلچسپی رکھنے والے افراد کو مستقبل قریب میں میٹا کی جانب سے ایک ماہ کے مفت ٹرائل کی پیشکش بھی کی جاسکتی ہے۔
