اسلام آباد ( ڈیلی پاکستان آن لائن ) وفاقی وزیرِ انفارمیشن ٹیکنالوجی شزا فاطمہ خواجہ نے کہا ہے کہ معیاری انٹرنیٹ سروس سے تعلیم اور صحت کے شعبے میں آسانی ہو گی فاصلے مٹ جائیں گے۔
’’جنگ ‘‘ کے مطابق ای یو پاکستان بزنس فورم سے خطاب میں انہوں نے کہا کہ 2016ء میں 3 اور 4 جی انٹرنیٹ لانچ کیا گیا، ملک میں موبائل فون استعمال کرنے والوں کی تعداد میں اضافہ ہو رہا ہے۔ کیش لیس معیشت میں کسی قسم کا دھوکہ نہیں ہوتا، ڈیجیٹل پاکستان وزیرِاعظم شہباز شریف کا ویژن ہے، وزیرِ اعظم کے مشن کے مطابق پاکستان ڈیجیٹل کی طرف گامزن ہے۔
وفاقی وزیرِ انفارمیشن ٹیکنالوجی شزا فاطمہ خواجہ کا یہ بھی کہنا تھا کہ انٹرنیٹ کا کردار ہر شعبے میں اہم ہے، معیاری انٹرنیٹ سروس سے تعلیم اور صحت کے شعبے میں آسانی ہو گی فاصلے مٹ جائیں گے۔ فائیو جی سے ملک میں انٹرنیٹ کی سپیڈ میں بہتری آئے گی، انٹرنیٹ کے کاروبار میں بھی اضافہ ہو گا۔