لاہور ( خصوصی رپورٹ )پاکستان نے عالمی آؤٹ سورسنگ ٹیلنٹ انڈیکس میں بڑی کامیابی حاصل کر لی ۔
تفصیلات کے مطابق پاکستان گلوبل آؤٹ سورسنگ ٹیلنٹ انڈیکس میں 16ویں نمبر پر آ گیا۔انڈیکس رپورٹ میں بتایا گیا ہے کہ ملک کی ٹیک انڈسٹری سالانہ بنیادوں پر 20 فیصد کی شرح سے ترقی کر رہی ہے، بہتر ڈیجیٹل انفراسٹرکچر کے ذریعے پاکستان 16 ویں سے 11 ویں نمبر تک جا سکتا ہے۔
اٹاراکسس (Ataraxis) کی جانب سے جاری کردہ 2026 گلوبل آؤٹ سورسنگ ٹیلنٹ انڈیکس کے مطابق پاکستان 193 ممالک میں سے 16ویں نمبر پر پہنچ گیا ہے، جو اسے عالمی سطح پر ٹاپ 9 فیصد ممالک میں شامل کرتا ہے۔
اس انڈیکس میں پاکستان نے متعدد بڑی معیشتوں کو پیچھے چھوڑ دیا ہے۔ پاکستان چین (37ویں)، ویتنام (32ویں)، کولمبیا (31ویں) اور مغربی یورپ کے تمام ممالک سے آگے ہے، جن میں جرمنی (84ویں)، فرانس (73ویں)، سپین (49ویں) اور برطانیہ (29ویں) شامل ہیں۔
پاکستان کا ٹیلنٹ سکور 80/100 ہے، جو اسے اس زمرے میں عالمی سطح پر 8ویں نمبر پر لاتا ہے۔ یہ سکور یورپی یونین کے تمام ممالک، مشرق وسطیٰ کے تمام ممالک اور افریقہ کے تمام ممالک سے زیادہ ہے۔
یہ درجہ پاکستان کی بڑی نوجوان آبادی، انگریزی پروفیشنسی، کم لاگت والے ہنر مند ورک فورس اور ڈیجیٹل شعبے کی ترقی کی عکاسی کرتا ہے۔
