ٹیکنالوجی کمپنی گوگل نے صارفین کی آن لائن پرائیویسی کو مزید محفوظ بنانے کے لیے گوگل کروم کے اینڈرائیڈ ورژن میں ایک اہم نیا فیچر متعارف کرا دیا ہے، جس کے تحت صارفین اب اپنی مکمل درست لوکیشن کے بجائے صرف اندازاً مقام شیئر کر سکیں گے۔
نئی اپڈیٹ کے بعد صارفین کو یہ اختیار حاصل ہوگا کہ وہ ویب سائٹس کو اپنی گلی، عمارت یا عین جغرافیائی مقام بتانے کے بجائے صرف قریب ترین یا عمومی لوکیشن فراہم کریں۔ ماہرین کے مطابق بیشتر ویب سائٹس کے لیے یہ اندازاً لوکیشن ہی کافی ہوتی ہے، جس سے غیر ضروری طور پر ذاتی معلومات کے افشا ہونے کا خطرہ کم ہو جائے گا۔
اس سے قبل گوگل کروم عموماً صارفین سے پریسائز لوکیشن تک رسائی طلب کرتا تھا، جس پر پرائیویسی کے ماہرین نے تحفظات کا اظہار کرتے ہوئے اسے غیر ضروری قرار دیا تھا۔
رپورٹس کے مطابق اگر کسی ایپ یا ویب سائٹ، جیسے نقشہ جاتی خدمات یا رائیڈ ہیلنگ پلیٹ فارمز، کو درست مقام درکار ہو تو صارفین اپنی مرضی سے پریسائز لوکیشن آن کرنے کا اختیار بدستور رکھیں گے۔
گوگل مستقبل میں ایک نیا اے پی آئی بھی متعارف کرانے کا ارادہ رکھتا ہے، جس کی مدد سے ویب ڈیولپرز واضح طور پر یہ طے کر سکیں گے کہ انہیں صارف کی اندازاً لوکیشن درکار ہے یا مکمل درست مقام۔
ٹیکنالوجی ماہرین اس اپڈیٹ کو آن لائن پرائیویسی کے میدان میں ایک اہم پیش رفت قرار دے رہے ہیں، کیونکہ اس سے صارفین کو اپنی ذاتی معلومات پر پہلے سے کہیں زیادہ کنٹرول حاصل ہوگا اور انٹرنیٹ استعمال کرتے وقت سیکیورٹی مزید بہتر ہو سکے گی۔