پیر کے روز سان ڈیاگو کے اسلامک سینٹر کے باہر فائرنگ کے نتیجے میں تین افراد ہلاک ہو گئے تھے، جب کہ پولیس کے مطابق، دو نوعمر مشتبہ افراد بعد میں خود کو گولی لگنے سے ہلاک ہوئے تھے۔
خبر رساں ادارے روئٹرز کے مطابق سان ڈیاگو کے پولیس چیف سکاٹ واہل نے بتایا کہ یہ حملہ شہر کے کلیئرمونٹ ضلع کی مسجد میں دوپہر سے کچھ دیر پہلے ہوا۔
حکام نے بتایا کہ متاثرین میں ایک سیکیورٹی گارڈ بھی شامل ہے جس نے مزید جانی نقصان کو روکنے میں مدد کی ہو گی۔
پولیس نے بتایا کہ مسجد سے منسلک ڈے اسکول میں جانے والے تمام بچوں کو فائرنگ کے بعد بحفاظت نکال لیا گیا۔
واہل نے کہا کہ تفتیش کار اس واقعے کو ممکنہ نفرت انگیز جرم کے طور پر دیکھ رہے ہیں، حالانکہ ابھی تک کسی مقصد کی تصدیق نہیں ہو سکی ہے۔ ایف بی آئی تحقیقات میں شامل ہو گئی ہے۔
اسلامک سنٹر کے امام اور ڈائریکٹر طحہ حسن نے کہا کہ "ہم نے اس طرح کا سانحہ پہلے کبھی نہیں دیکھا۔ عبادت گاہ کو نشانہ بنانا انتہائی افسوسناک ہے۔”
پولیس کو بعد میں قریب ہی ایک گاڑی کے اندر سے 17 اور 19 سال کی عمر کے دو مشتبہ افراد کی لاشیں ملی، اور یقین ہے کہ دونوں کی موت خود کو گولی لگنے سے ہوئی تھی۔
قانون نافذ کرنے والے افسران نے ایک فعال شوٹر کی اطلاع کے چند منٹوں میں ہی جائے وقوعہ کو گھیر لیا۔ ٹیلی ویژن فوٹیج میں دکھایا گیا ہے کہ بھاری مسلح پولیس مسجد کے احاطے کو گھیرے میں لے رہی ہے۔
یہ حملہ عید الاضحی اور سالانہ حج سے پہلے ہوا ہے، ایسے وقت میں جب مشرق وسطیٰ میں کشیدگی اور تنازعات کے بعد مسلم کمیونٹیز میں شدید تشویش پائی جاتی ہے۔