گوگل نے اپنی مصنوعی ذہانت پر مبنی خدمات میں اضافہ کرتے ہوئے یوٹیوب کے لیے نیا اے آئی سرچ فیچر “Ask YouTube” متعارف کرا دیا۔
غیر ملکی خبر رساں ایجنسی کے مطابق گوگل حکام نے کہا ہے کہ اس فیچر کے ذریعے صارفین کسی بھی موضوع پر پیچیدہ سوالات کر سکیں گے۔ جس کے جواب میں یوٹیوب نہ صرف متعلقہ ویڈیوز تجویز کرے گا۔ بلکہ ان کا خلاصہ (سمری) اور اضافی معلومات بھی فراہم کرے گا۔
نئے فیچر کی خاص بات یہ ہے کہ یہ صارف کو ویڈیو کے اُس مخصوص حصے تک براہ راست لے جائے گا۔ جہاں مطلوبہ معلومات موجود ہوں۔ جس سے طویل ویڈیوز دیکھنے کی ضرورت کم ہو جائے گی۔ اس کے علاوہ صارفین فالو اپ سوالات بھی چیٹ بوٹ طرز پر پوچھ سکیں گے۔
گوگل کے سی ای او سندر پچائی نے سالانہ ڈیولپر کانفرنس کے دوران اس فیچر کا اعلان کرتے ہوئے کہا کہ “Ask YouTube” معلومات تک رسائی کو زیادہ تیز، آسان اور مؤثر بنائے گا۔
ابتدائی مرحلے میں یہ فیچر صرف امریکہ میں 18 سال یا اس سے زائد عمر کے یوٹیوب پریمیئم صارفین کے لیے دستیاب ہے۔ تاہم کمپنی نے کہا ہے کہ اسے جلد دیگر ممالک تک بھی توسیع دی جائے گی۔
ٹیکنالوجی ماہرین کے مطابق یہ فیچر یوٹیوب سرچ کے روایتی طریقہ کار کو بدل سکتا ہے کیونکہ اب صارفین کو معلومات کے لیے مکمل ویڈیوز دیکھنے کے بجائے فوری اور درست جوابات حاصل ہو سکیں گے۔