آج کل کے حالات میں لوگ کیش کے بجائے اے ٹی ایم کارڈ استعمال کرتے ہیں اور ضرورت پڑنے پر کہیں بھی مشین سے رقم نکال لیتے ہیں۔ سٹریٹ کرائم اور ڈکیتی کی وارداتوں میں اضافے کے بعد اب سرعام کیش لے کر چلنا خطرناک ہو گیا ہے، اس لیے زیادہ تر لوگ رقم کی منتقلی اور نکالنے کے لیے کیش کے بجائے اے ٹی ایم کارڈ پر انحصار کر رہے ہیں۔
اس کارڈ کے ذریعے کوئی بھی شخص کسی بھی جگہ موجود اے ٹی ایم مشین سے اپنے اکاؤنٹ سے مطلوبہ رقم حاصل کر سکتا ہے۔
تاہم کبھی ایسا بھی ہوتا ہے کہ کارڈ ڈالنے کے بعد مطلوبہ رقم ظاہر ہو جائے، لیکن تکنیکی خرابی یا نیٹ ورک کے مسئلے کی وجہ سے رقم مشین میں پھنس جاتی ہے۔
اس صورتحال میں متاثرہ شخص پریشان ہو جاتا ہے اور یہ فکر رہتی ہے کہ رقم ضائع نہ ہو جائے۔ اگر کبھی آپ کے ساتھ ایسا ہو تو گھبرانے کی ضرورت نہیں، چند آسان اقدامات سے آپ اپنے پیسے محفوظ رکھ سکتے ہیں۔
اگر تکنیکی خرابی کی وجہ سے رقم مشین میں پھنس جائے تو چند منٹ انتظار کریں، کیونکہ سرور درست ہوتے ہی رقم نکالی جا سکتی ہے۔ اکثر یہ مسئلہ 10 سے 15 منٹ میں حل ہو جاتا ہے۔
اگر رقم کاٹ لی گئی ہے اور مشین میں پھنس گئی ہے تو اپنی ٹرانزیکشن سلپ محفوظ رکھیں، کیونکہ یہ شکایت درج کرنے اور رقم کی واپسی کے لیے مددگار ثابت ہوگی۔
کئی بار بینک سسٹم 24 گھنٹے کے اندر خود بخود رقم واپس کر دیتا ہے۔ اگر 24 گھنٹے بعد بھی ایسا نہ ہو تو بینک کسٹمر کیئر یا متعلقہ برانچ سے رابطہ کر کے شکایات درج کرائیں۔
بینک عموماً ایک ہفتے میں مسئلہ حل کر دیتے ہیں۔
