گورنر اسٹیٹ بینک آف پاکستان جمیل احمد نے ورلڈ بینک میں خطاب کرتے ہوئے کہا ہے کہ خواتین کا کردار ترقی پذیر ممالک کی معاشی ترقی میں انتہائی اہم ہے۔
انہوں نے کہا کہ خواتین کو بااختیار بنانا اور معاشی ترقی میں صنفی شمولیت کو فروغ دینا اسٹیٹ بینک کی ترجیحات میں شامل ہے، برابری پر بینکاری کے اقدام نے مالی شمولیت میں صنفی فرق کم کرنے میں نمایاں کردار ادا کیا ہے۔
گورنر اسٹیٹ بینک کے مطابق ملک میں خواتین کے فعال بینک اکاؤنٹس کی تعداد 3 کروڑ 70 لاکھ تک پہنچ چکی ہے، جب کہ خواتین کو قرضوں کی فراہمی میں بھی خاطر خواہ اضافہ ہوا ہے۔
انہوں نے کہا کہ گزشتہ پانچ سالوں میں مائیکرو فنانس بینکوں کی جانب سے خواتین کو قرض دینے کی شرح میں 200 فیصد اضافہ ہوا ہے، اسی طرح خواتین کی چھوٹی اور درمیانی انٹرپرائزز اور زرعی قرضوں کے پورٹ فولیوز بھی دگنے ہوچکے ہیں۔
جمیل احمد نے مزید بتایا کہ گزشتہ تین برسوں میں 14 ہزار 600 سے زائد خواتین بینکوں کی ورک فورس کا حصہ بنی ہیں، جو مالیاتی شعبے میں خواتین کی بڑھتی ہوئی شمولیت کی عکاسی کرتا ہے۔
