دنیا کا پہلا ایروپونک ڈیسک ٹاپ سسٹم تیارکر لیا گیا ہے جس سے گھروں میں مٹی اور پانی کے بغیر پودے اگائے جاسکتے ہیں۔
واضح رہے کہ ایروپونکس ایک ایسا طریقہ کار ہے جس میں مٹی یا کسی اور میڈیم کے بغیر ہوا یا دھند کے ماحول میں پودوں کی کاشت کی جاتی ہے،اس طریقہ کار کا استعمال طویل عرصے کیا جارہا ہے، اور بہت سے لوگ اسے پودوں کی کاشت کا مستقبل سمجھتے ہیں۔
تاہم اب آپ ایزسٹِی پلانٹ کلٹیویٹر نامی دنیا کے پہلے ایروپونک ڈیسک ٹاپ ایکو سسٹم کے ساتھ اپنے گھر میں بیٹھ کر اس دلچسپ عمل کا تجربہ کر سکتے ہیں۔
ایزسٹِی پلانٹ کلٹیویٹر جسے یونی ژینگ نے ڈیزائن کیا ہے ایک ایروپونک سسٹم ہے جسے دنیا کا سب سے جدید گملہ کہا جائے تو بےجانہ نہ ہوگا، شفاف کنٹینر میں پودے کی جڑوں کو واضح طور پر بڑھتے ہوئے دیکھا جاسکتا ہے.
جو ہوا میں معلق ہوتی ہیں، جبکہ پودے کی افزائش کے لیے مٹی اور پانی کے بجائے ایک اسپرے کے ذریعے نیوٹرنٹ سے بھرپور بخارات کا استعمال کیاجاتا ہے جو ڈیوائس کے نیچے دیے گئے ہیں، یہ بخارات پودوں کو غذائیت فراہم کرتے ہیں اور افزائش میں مدد دیتے ہیں۔
