چیری پاکستان نے کراچی میں منعقدہ حالیہ پاکستان آٹو شو میں نمائش کے بعد اب باضابطہ طور پر اپنی فلیگ شپ ہائبرڈ ایس یو وی ٹگو 8 پی ایچ ای وی کی قیمت کا اعلان کر دیا ہے۔
کمپنی کے مطابق 7 نشستوں پر مشتمل یہ پلگ اِن ہائبرڈ ایس یو وی اب ملک بھر میں دستیاب ہے، جس کی قیمت 1 کروڑ 9 لاکھ 99 ہزار روپے مقرر کی گئی ہے۔
ٹگو 8 پی ایچ ای وی لگژری، بہترین کارکردگی اور جدید ٹیکنالوجی کا امتزاج ہے، یہ ایس یو وی ایک طاقتور ہائبرڈ پاور ٹرین سے لیس ہے جو 543 ہارس پاور اور 830 نیوٹن میٹر ٹارک پیدا کرتی ہے۔
گاڑی میں نصب 18.3 کلو واٹ آور کی بیٹری صرف الیکٹرک موڈ پر 77 کلومیٹر تک سفر کی صلاحیت رکھتی ہے، جبکہ مجموعی طور پر اس کی ڈرائیونگ رینج تقریباً 1,020 کلومیٹر تک پہنچ جاتی ہے۔
مزید سہولت کے لیے وینٹی لیٹڈ الیکٹرک سیٹس، ایمبینٹ لائٹنگ اور ڈوئل زون کلائمٹ کنٹرول بھی فراہم کیا گیا ہے، جو تمام مسافروں کے لیے کیبن کو آرام دہ بناتا ہے۔
حفاظتی پہلوؤں پر بھی خاص توجہ دی گئی ہے، ٹگو 8 پی ایچ ای وی میں 10 ایئر بیگز، جدید اے ڈی اے ایس ڈرائیور اسسٹنس سسٹمز اور 360 ڈگری کیمرا شامل ہے، جو ڈرائیور اور مسافروں دونوں کے تحفظ کو یقینی بناتے ہیں۔
ٹگو 8 پی ایچ ای وی کی بکنگ 15 جنوری سے شروع ہو کر 31 جنوری تک جاری رہے گی، جس کے لیے 50 لاکھ روپے کی ڈاؤن پیمنٹ مقرر کی گئی ہے۔
گاڑی کی ڈیلیوری 26 اپریل 2026 سے شروع کی جائے گی۔
چیری پاکستان نے یہ بھی عندیہ دیا ہے کہ ٹگو 7 اور ٹگو 9 سیریز کی قیمتوں کا اعلان آئندہ چند مہینوں میں متوقع ہے، جس کے بعد پاکستان میں ہائبرڈ ایس یو ویز کی لائن اپ مزید مکمل ہو جائے گی۔
