سوشل میڈیا پلیٹ فارمز تخلیقی صلاحیتوں کو سراہنے اور مواد تخلیق کرنے والے فنکاروں کو نمایاں کرنے کے لیے خصوصی ایوارڈز کی تقریبات کا انعقاد کر رہے ہیں، اور اب سنیپ چیٹ بھی اس فہرست میں شامل ہو گیا ہے۔
سنیپ چیٹ نے اعلان کیا ہے کہ وہ اپنی پہلی “سنیپی ایوارڈز” تقریب 31 مارچ 2026 کو اپنے ہی ہیڈکوارٹر میں منعقد کرے گا۔
اس تقریب کا مقصد پلیٹ فارم پر بہترین مواد تخلیق کرنے والے تخلیق کاروں کی محنت، تخلیقی اثرات اور خدمات کو تسلیم کرنا ہے۔ تقریب کی میزبانی مشہور مزاح نگار اور آن لائن تخلیق کار میٹ فرینڈ کریں گے۔
تقریب میں مختلف زمروں میں اعزازات دیے جائیں گے، جن میں سب سے بہترین پرفارمر، بہترین کہانی کار، سال کا ابھرتا ہوا تخلیق کار اور دیگر شعبوں میں شاندار کارکردگی کو تسلیم کیا جائے گا۔
اس کے علاوہ تعاون، ثقافتی اثر اور مخصوص موضوعات میں بہترین تخلیق کو بھی اعزازات سے نوازا جائے گا۔
سنیپ چیٹ کا یہ اقدام تخلیق کاروں کے لیے حوصلہ افزا ثابت ہوگا اور انہیں پلیٹ فارم پر اپنی تخلیقی صلاحیتوں کو مزید نکھارنے کا موقع فراہم کرے گا۔
یاد رہے کہ گزشتہ سال ٹک ٹاک نے بھی اپنے پہلے تخلیق کاروں کے اعزاز شو کی میزبانی کی تھی، جس میں اعلیٰ معیار کے مواد تخلیق کرنے والوں کو مختلف زمروں میں اعزازات سے نوازا گیا۔
